نه ایشیم وار؟
دشمن‌لره محتاج اولور- اولسون نه ایشیم وار؟
قوی من توخ اولوم اؤزگه‌لرایله نه‌دی كاریم!
دونیا و جهان آج اولور- اولسون نه ایشیم وار؟
سس سالما، یاتانلار آییلار، قوی هله یاتسین،
یاتمیشلاری راضی دگولم، كیمسه اویاتسین،
تك تك آییلان وارسادا، حق دادیمه چاتسین،
من سالم اولوم جمله جهان باتسادا باتسین،
ملّت نئجه تاراج اولور- اولسون، نه ایشیم وار؟
دشمن‌لره محتاج اولور- اولسون نه ایشیم وار؟
سالما یادیما صحبت تاریخ جهانی،
ایام سلفدن دئمه سؤز بیر ده فلانی،
حال ایسه گتیر میل ائله‌ییم دولمانی، نانی،
مستقبلی گؤرمك نه گرك، عمردو فانی،
ملّت نئجه تاراج اولور- اولسون، نه ایشیم وار؟
دشمن‌لره محتاج اولور- اولسون نه ایشیم وار؟
اولاد وطن قوی هله آواره دولانسین،
چركاب سفالتله الی، باشی بولانسین،
دول عورت ایسه سائله اولسون، اودا یانسین،
آنجاق منیم آوازه‌ی شانیم اوجالانسین،
ملّت نئجه تاراج اولور- اولسون، نه ایشیم وار؟
دشمن‌لره محتاج اولور- اولسون نه ایشیم وار؟
هر ملّت ائدیر صفحه‌ی دنیاده ترقی،
ائیلر هره بیر منزل و مأواده ترقی،
یورغان دوشه‌گیمده دوشه گر یاده ترقی،
بیز ده ائده‌ریك عالم رؤیاده ترقی،
ملّت نئجه تاراج اولور- اولسون، نه ایشیم وار؟
دشمن‌لره محتاج اولور- اولسون نه ایشیم وار؟
شاعر: میرزا علی اكبر صابر(هوپ هوپ نامه)
