سواره تیغ برق افشان...
سواره تیغ برق افشان الینده فكری دعوا دور
مرصّع دور لجامی، مركبون زینی مطلّا دور
قزل جوشن وار اگنینده جلال و شأنی اعلا دور
حسین ابن علی روح نبی دلبند زهرا دور
بو وصفیلن گلوب میدان جنگه حیف تنها دور
سلاح جنگینون هر قطعه سی میراث سلطانی
رسول اكرمون درّاعه و دستار شایانی
جناب حمزه نون گوهر نشان نُه قبّه قلخانی
علی المرتضی نون ذوالفقار تیز و برّانی
طلابفت و جواهر كوب یك قبضه دو پهنا دور
هوایه ذوالجناحون نعل آلتدان كیمیا قالخار
كانّه دنده ی سوهانیدن مغز طلا قالخار
نئجه لاهوته گور ناسوتیدن نور خدا قالخار
سوسوز لبلردن اما كلمه‌ی انّی فدا قالخار
كنایه بو مبارك كلمه دن ذبحاً عظیما دور
حسینه خارجی آدی قویوبدور زاده ی هنده
شریحون خط و امضا سیله تكمیل اولدی پرونده
او حكمون رو نوشتین یازدی اوراقه نویسنده
سراسر مملكتده ائتدیلر پخش و پراكنده
حسینون قتلی گویا مسلمینه فرض ایفا دور
یزیدون حیطه‌ی حكمینده اسلامی اولان یئرلر
نقاط آسیاده چینه پیوسته نئچه كشور
حدود غربده اقیانوس اطلس، موج آور
شمالاً انتهای سیبریه مرزیدی سرتاسر
جنوباً استوائی خطه تاریخ حكمفرما دور
حبش نزدیك خط استواده خاك آفریقا
اروپاده فرنگستانیدن بیر حَد مستثنی
شمالیده وین اطریشده پاتختدور حالا
هنودستاندا پاكستان فعلی خطّه‌ی زیبا
قدیمی نقشه لرده بو ممالك نصف دنیا دور
بو وسعتده ممالك ده دهستان واردی شهرستان
گله هرتك تكیندن اون نفر تشكیل تاپار ملیان
فریضه بیلدیلر حكم شریحی مردم نادان
بلا صحراسینه لشكر شتابان اولدی هر یاندان
گوروندی روز عاشورا قشون چوخ موج دریا دور
شیوخ نهروان قرآن حمایل آلنی برجسته
سُنین نیزه‌لر بنذر زبان افعی مسته
سه شعبه تیر و پیكان جعبه دانلاردا نئچه دسته
قلجلار سوولانوب قول چمرانوب دامن بئله بسته
امام ئولدورمگه الله اكبر گور نه غوغا دور
نقاب اعرفونی آتدی وجه الله جمالیندن
او نابینالر آلسون فائده شمع وصالیندن
یاغاردی دُرّ ابیض لعل و یاقوت اتصالیندن
اولون آگه جماعت سیز حسینون شرح حالیندن
بابام احمد آتام حیدر آنام زهرای كبرا دور
ندای اعرفونی دفعتاً ناقص قویوب لشكر
آیاقلار بیر بیرینه دگدی سسلندی اوزنگی‌لر
نئجه آهن دوگنده سسلنور دكان آهنگر
پیاده صف لریندن ظاهر اولدی مختلف سسلر
امامون حجتینه بو هیاهو عذر بی جا دور
بو وضع نامناسب شهریاری ائله دی وادار
او قومه بیر نمونه قدرتیندن ائله سین اظهار
بویوردی ایها الجند الشاطین اسكتوا زنهار
واریمدور اقتداریم روحوزی الآن ائدیم احضار
منیم حكمیم تمام انفاس و ارواح ایچره مجرا دور
نشست ائتدی او دم رعب امامت نحس دللرده
تصرفله قوروتدی قوّه‌ی روحی بدنلرده
پیاده یا سواره دوردی ساكت دوردوقی یئرده
یونولمیش داش تك هیكل‌لر صف اندر صف برابرده
فنا آیینه سینده هر بیری بیر صورت لا دور
بو قدرتلن سیزی ائتدیم مخیّر اوچ سوزه لشكر
گورون ذی نفع سوز هانسیندا اجرا ائیله یین سیزلر
قیتسون یثربه منع ائتمیون تا آل پیغمبر
وئرون یا بیر بیچیم سو تشنه دور تشنه یانور لبلر
و یا گنجیمه گلسون بیر به بیر كیم مرد هیجا دور
قبوله یتمدی افسوس شرط اول و ثانی
اوچومجی شرط قانون عرب جلب ائتدی اعدانی
شجاعان مبرّز گلدی دوتدی راه نیرانی
او روباهان كم جرئت تانیدی شیر میدانی
غراب بی هنر هاردان حریف رزم عنقا دور
گوروب سعداوغلی تاپماز قصدی بو ترتیبلن انجام
وئروب فرمان یئریندن اوینادی نیروی خون آشام
قشون واحدلری جنگ وجود واحده اعزام
او غیر عادلانه حمله كه اونلار ائدوب اقدام
نه قانون عرب طرز رسم ترسا دور
نئجه پوره وئرور یای فصلی پشَه شهد ناب اوسته
اونون مثلینده لشكر حمله گتدی اول جناب اوسته
نئجه بیر خشمگین شهباز اوچار فوج غراب اوسته
اونون مثلینده حضرت زیندن قالخوب ركاب اوسته
ملخ دن موردون زنبوردن شیره نه پروا دور
دوه‌لر صیحه سی آت شیهه سی آواز واویلا
عربلر سسلنور طبل و دهل گرهاگر اعدا
طنین اندازی دی آفاقه صوت غرّش و عرّا
او ساعتدور اهم ساعت ساعات عاشورا
هامی قدّوسیان حیرتده مشغول تماشا دور
هوانی توز دونوب یئللر اسور صحرا اولوب طوفان
زرهلر سسلنور اوخلار یاغور ردّ ائیله ییر قلخان
پاریلدار تیغلر آت دیرناقیندان برق اولور تابان
حسینون صولتی فرداً به فردین ائیله ییب لرزان
گوروندی هرباش اوسته بیر حسین بیر تیغ برّا دور
انا بن راكب الرفرف مقیمالعرش بالنعلین
انا بن ضارب السیفین انا بن صاحب الرمحین
انا بن فاتح خیبر انا بن فارس الصفین
انا بن سیّد الكونین با كی العینین
قریشون افتخاری خانه زاد حیّ یكتا دور
ابی مخنف دئیر بیر گوشه ده دور دوم تماشایه
حسینون سینه سین گوردیم نشان تیر اعدایه
اوخا پیوند اولوب اوخ تپراقا اوخلار سالوب سایه
یوخیدی یاره سی دالدان دلیلیم وار بو معنایه
او حضرت غیر فرّار اوغلیدور كرّار اعدا دور
قناد آچمیشدی اوخدان اوخشیوردی مرغ پرداره
زره منفذلریندن قان آتاردی مثل فوّاره
محاسن مولریندن قان سوزردی زین زرداره
اولوبدور ذوالجناحون سینه بندی سینه ده پاره
بویانمیش راكب و مركوب چون یاقوت حمرا دور
بو حالتدن عجب‌تر حیرت آور بیر بو مطلب دور
اؤلوب قارداشی اوغلی لشكری قانه مخضب دور
قالان تنها اوزی دور بیر قلج دور بیرده مركب دور
سسینه سس وئرن عورت اوشاقدور بیرده زینب دور
بو اوصافیله اعدا افكن و ضرغام غرّا دور
روایتدور چكردی اول جناب هر نعره كه دلدن
مبارزلر وئروردی اختیار مركبی الدن
چكیلدی كوفه سمتیتنه قاچان لشگر مقابلدن
كنار اولدی او ساعت نور حق ظلمات باطلدن
بلی دیجوردن شمس جهان آرا مبرّا دور
قیتدی مركز میداندا دوردی مفخر لولاك
آلیشمیشدی حرارتدن اورك، عطشان دوداقلار خاك
قوری تخته كیمی آغزیندا دیلدن سس اولور ادراك
خطابی لشكر سفیانه من الما دور
كئچوردی بیر نفر سیّاح دنیاگرد گردآلود
الینده چوبدست آشفته مو چالاك و ره پیمود
حمایل گردنینده سو دولی بیر قمقمه موجود
غذا و قوتی همیانینده مست باده‌ی مقصود
زمین كربلاده گوردی بیر محشر هویدا دور
داغیلمیش حربگاهه قولدی باشدی دوغرانان پیكر
دایانمیش نیزیه بیر سیّد وظلوم و بی یاور
دوداقینده دیلینی گزدیرور گویا كه سو ایستر
ولی تشخیص اولونماز پیكری پیكاندور اعضادور
چیخارتدی كیسه دن بیر ظرف چوبینه شتابیلن
همان ظرفی لبالب ادی فی الفوری آبیلن
مقابل اولدی سیاح احتراماً اول جنابیلن
ایكی الده تعارف ائتدی عذر بی حسابیلن
دئدی آل ای غریب ایچ بو سوئی خیلی گوارا دور
او میراب بهشتی ساقی كوثر دلارامی
كمال لطف ایلن سیّاح الیندن آلدی اول جامی
سوئی سپدی یئره سو ایچمدی بو تشنه هنگامی
ایكی انگشت آرا سیندان ائدوب سیّاحه اعلامی
بویوردی گور نه عالم سیر ائدورسن هانسی ماوا دور
امامون امرینه تسلیم اولوب سیّاح خوش كردار
چكیلدی پرده‌ی غفلت گوزیندن كشف اولوب اسرار
باخاندا بیر مكان گوردی مشجر گلشن و گلزار
ریاض جنت فیها عیون تجری الانهار
قدح‌لر الده شربتلن دولی آماده حورا دور
دوباره ائیله دی سیّاحی آگه سرّ پنهاندان
توكوب سو جامینه بیر قبضه حضرت ریگ میداندان
قاماشدی مرد سیّاحون گوزی برق درخشاندان
دولی گوردی سو جامین گوهر و لعل فروزاندان
تمام الماس و مرجان و زبرجد درّ لالا دور
گورنده بو ایكی اعجازی غیبون پرده داریندن
تعجب ائیله دی شاهون عجایب اقتداریندن
بو ایستی بو عطش بو قدرت و صبر و وقاریندن
ییخیلدی ذوالجناحون اوپدی سُمّ خاكداریندن
دئدی جانیم سنه قربان بو نه سرّ معما دور
بویوردی من امام عالمینم ای سعادتمند
فراتی قادرم آب حیاته ائیله‌م پیوند
علی اوغلی حسینم من بلاده شاكر و خرسند
اوزوم اوز رغبتیمله دام عشقه اولمیشام دلبند
شهادت شاهده شیرین‌تر از شهد مصفّا دور
بودور علت بو قدرتلن بئله عطشانم ای سیاح
یازیلمیش عهدناممده سوسوز قربانم ای سیاح
مقصرلر پناهی محرم دیوانم ای سیاح
عزاداره جزاده شافع عصیانم ای سیاح
بهشت اهلی دی كیم اهل بكا و او تباكا دور
شهادت امری صادر اولمادی سیاحه مولادن
شفاعت قولین آلدی آغلادی گئتدی او صحرادن
دولاندیردی لجام مركبی حضرت او ماوادن
وداع آخرین قصدیله اندی تلّ بالادن
او تلّی كه میان عرصه و اخیام طاها دور
خانم زینب دئییر خیمه قباقینده باخوردوم من
گوروم آیا حسینیمله نه رفتار ائیلیه ییر دشمن
سرازیر اولدی بیر تپراقلی طوفان تلّون اوستیندن
گلور توز درك اولونماز بو نه توزدور قوزانور یئردن
توز ایچره آت ایاقینون صدای نعلی پیدا دور
تعجب حالیله دقت ائدردیم تا ندور مطلب
یاخونلاشدی توز آیریلدی نمایان اولدی بیر مركب
آت اوسته پارچا قاندان غیری بیر زاد گورمدیم یا رب
صدا گلدی علیكن السلامی اختی یا زینب
تانیدیم لهجه سیندن كیم حسین بو لفظه گویا دور
سیزی اللهه تاپشوردوم بویوردی شاه بی لشكر
داخی یوخ صحبته فرصت منی زهرا آنام گوزلر
فراز عرشدن جدّیم پیمبردور منی سسلر
قیامتده عزاداریم اگر من گئتمسم نئیلر
بو باش بو جان لو پیكر قیمت مقطوع سودا دور
ائله سرعتله آت سوردی حسین میدان دعوایه
نه زینب یادینه دوشدی نه باخدی آه لیلایه
دالیجان منده یوز قویدوم گوزی یاشلی او صحرایه
دئدیم قارداش قسم وئرره‌م سنی مظلومه زهرایه
حسین جان بیر توقّف قیل باجون صاحب تمنّا دور
حسینین ساخلادی یولدان شرار آهیلن زینب
یول اوسته قول بویون اولدی او شاهنشاهیلن زینب
ائدیبلر رمزلی صحبت ولیّ اللهیلن زینب
قیتدی خیمه سمتینه دل آگاهیلن زینب
او صحبتدن نتیجه هر بلالرده شكیبا دور
تمام ائت «یحیوی» تحریره یوخدور خامه ده یارا
فصاحتله بو نظم آبداری ائیله دون انشا
آپارسون فیض سرشارین مجالسده آتان یحیی
چكوب زحمت بساط كربلائی ائتموسن احیا
نقدری واردور آثارون آدون مشمول احیا دور
استاد یحیوی
او وسعتده بیابانون بساطین دولدوروب لشكر