قـه‌فـه

آشیان مرغ دل، زلف پریشانیندادیر

قاندا اولسام ای پری! كؤنلوم سنین یانیندادیر

عشق دردیله خوشام، ال چك علاجیمدان طبیب!

قیلما درمان كیم، هلاكیم زهری درمانیندادیر

چكمه دامن ناز ائدیب افتاده‌لردن، وهم قیل!

گؤیلره آچیلماسین اللر كی، دامانیندادیر!

گؤزلریم یاشین گؤروب شور، ائتمه نفرت كیم بو هم

اول نمك‌دن‌دیر كی لعل شكّر افشانیندادیر

مست خواب ناز ائدیب جمع ائت دل صد پاره‌یی

كیم اونین هر پاره‌سی بیر نوك موژگانیندادیر

بس كی هجرانیندادیر خاصیت قطع حیات

اول حیات اهلینه حئیرانام كه هجرانیندادیر

ای فضولی! شمع تك مطلق آچیلماز یانمادان

تابلار كیم سونبولوندن رشته‌ی جانیندادیر

شاعر: ملامحمد فضولی