قـه‌فـه

بویون سرو سهی زولفون معنبر

جمالین یوسف كنعانه بنزر

قاشین عاشیق لرین قصدینه گویا

خم اولموش تیغ سر افشانه بنزر

آچاندا گوزلرین آلیر بو جانی

یاتاندا فتنه دورانه بنزر

باخاندا نازیله تیر نگاهین

كونولده خنجر برانه بنزر

دیلون بولبول ساچین سونبول اوزون گول

كج اولموش كیپریگین پیكانه بنزر

مه رخسارین ای حور بهشتی

گولستاندا گل خندانه بنزر

ویریب باد صبا زولفون داغیتمیش

گول اوزده دسته ریحانه بنزر

لب لعل شفا بخشین عزیزیم

بعینه چشمه حیوانه بنزر

خالین هندو صفت كونج لبینده

اوتورموش تخت آرا سولطانه بنزر

سنین كوینده عاشیقلر فغانی

چمنده بولبول خوش خوانه بنزر

گوزوم یاشی فراقوندن اوزومه

سراسر لولوء غلطانه بنزر

اگر چه عاشیقین چوخدور ولیكن

اینانما هئچ بیری حیرانه بنزر

حیران خانم