شفقت باجیسی
ایندی هنر وقتی، غیرت دمی‌دیر
سن‌ده اسیرگمه كمك الینی
هر سوزون، صحبتین جان ملحمی‌دیر
آدین شرفلی‌دیر سنین، ای قادین!
داهی‌لر آناسی چاغرییر آدین
الینله قوردیغین بارلی باغچالار
طوفانلار قوپسادا سارالیب سولماز
بیزیم بو یئرلرده بیر مثل ده وار
«اصلانین ارككی، دیشی‌سی اولماز!»
جبهه‌لر چاغیریر، گل دوشه‌ك یولا،
ظفر بیزیمكی‌دیر، اوغورلار اولا!...
ازل‌دن تمیزدیر، صاف‌دیر اوره‌گین
بیرده شاعرانه طبیعتین وار
حیات عاشقی‌دیر عشقین، دیلگین
دیلده داستان اولان محبّت‌ین وار
وار اولسون جهاندا عشقین، املین
وار اولسون دائماً یارادان الین!
گل چیخاق جبهه‌یه، امر ائدیر وطن
سن‌ده بو میداندا كوكره‌ییب چاغلا!
دشمنین گولله‌سی دگسه سینمدن
مهربان الینله یارامی باغلا!
حیات وئره‌جكدیر بیزه درمانین
الینله پوزیلسین حكمی زمانین
گل ایندی جبهه‌ده یولداش اولاق بیز
بیرجوت اصلان كیمی وورشاق قوشا
ظفرله قورتارسین مبارزه‌میز
سونرا ئوز ائوینده بختیار یاشا
وطنین گوزلری ایندی بیزده‌دیر
آزادلیق چراغی الیمیزده‌دیر
گل آی جمالینین صاف شعله‌سندن
بیرده ایشیقلانسین سینمده اوره‌ك
گل، وطن عشقینین یوروش سسیندن
سئل كیمی كوكره‌ییب هجوما كئچه‌ك
آشیب شیش داغلاری، مئشه‌لیگ‌لری
گونده بیر ظفرله گئده‌ك ایره‌لی
گل قیزیل اردویا! ساریل بو گونه!
پارلا یاز گونونین سحری كیمی
توتوم اوزنگینی، قالخ آت اوستونه
سن قاچاق نبی‌نین هجری كیمی
هجوما كچدیكجه نعره چكیب‌سن
گونش نور توكه‌جك اوستونه گوگدن
الینله قوردوغون بارلی باغچالار
طوفانلار قوپسادا، سارالیب سولماز
بیزیم بو یئرلرده بیر مثل‌ده وار!
«اصلانین ارككی، دیشی‌سی اولماز!»
جبهه‌لر چاغیریر، گل دوشه‌ك یولا
ظفر بیزیمكی‌دیر، اوغورلار اولا!...
شاعر: صمد وورغون 1941
