قـه‌فـه

گینه گلـدی مـاه-ی-محـرّمـون

هامێ باتـدێ ماتمه یا حسین

وئـر ایـجــازه آدۇوۇ شیـعـه‌لـر

یـازا قـارا پـرچمــه یا حـسیـن

تؤكۆلۆر گؤزۆم یاشێ دامنه

بۇ نه دردیم اوْلسا دواسیدی

هامێ قارا كؤینه‌گیله‌ن گزیر

هامێ یئرده نوحه صداسیدی

خبر آلسالار كیم اؤلۆب گینه

دییه‌ره‌م آقامێن عزاسیدی

اوْ كی دردی وار ائدیر آدۇوۇ

اۆره‌گینده زمزمه یا حسین

بیلیره‌م مسیح ائده‌ر آرزو

اوْلا نوكر آل-ی-پیمبره

دئمیره‌م كی نوكریوه‌م ولی

وار علاقه‌م عترت-ی-حیدره

علی اصغره گؤره امر ائله

یازا اكبر آدێمی دفتره

چوْخ عنایت ائیله‌میسه‌ن منه

اوْدۇ قانعم كمه یا حسین

آقاجان كیمین قاپێسێن دؤیۆم

كی سنین كیمی اوْلا ذوالكرم

كرمونده‌ن ائیله‌مه نااۇمۇد

بۇ گدانی ای شه-ی-محترم

آچ اوْ باغلێ یوْللارێ ایل به ایل

گله شیعه‌لر دوْلا بوْش حرم

بیزی مَحرم ائیله اؤزۆن بۇیۇر

یوْل آچێخدێ مَحرمه یا حسین

سنی آند وئرره‌م اوْ حاله كی

یئره دادخواهیوی یێخدێلار

سۇ یانێندا توْپراقا حامل-ی-

علم-ی-سیپاهیوی یێخدێلار

دئدی گل هراییمه سیّدی

منی بی‌پناهیوی یێخدێلار

آپارێب اوْ جذبه خیامیده‌ن

سنی نهر-ی-علقمه یا حسین

گؤزۆ قانلێ باخدێ جمالیوه

دئدی ای شه-ی-زمن آغلاما

نوه‌ی-‌ی-محمّدمصطفی(صلی‌الله علیه و آله السلام)

پسر-ی-ابوالحسن آغلاما

سنه جان دوْداقدا من آغلێرام

باشێم اۆسته باری سن آغلاما

دۇرۇب اللرۇندان اؤپه‌نمیره‌م

اوْدۇ دۆشمۆشم غمه یا حسین

جالانێبدێ گرچه سۇ مشگیده‌ن

عموسین رقیّه امین بۆله‌ر

یئتیر اوْل امانتی زینبه

اؤزۆ آهێمێن اثرین بیله‌ر

علمیله مشگی مدینه ده

نئجه ساخلار امّ‌بنین بیله‌ر

منه نوحه كیم دئسه سۇ سؤزۆن

اوْخۇسۇن مقدّمه یا حسین

قۇرۇیۇبدۇ گرچه دوْداقلارێم

من عزیز-ی-ساقی-ی-كوثرم

بابام الده سۇ گتیریب ولی

سن آقامسان ایچمه‌سوْن ایچمه‌ره‌م

آقالێق وارۇن آقاسان منه

علی اوْغلۇیام، سنه نوكرم

بۇ شرفله ائیله‌رم ایفتیخار

شُهدای-ی-عالمه یا حسین

دئ باجۇن حلال ائله‌سین منی

اوْنا یاخشێ قارداش اوْلانمادێم

سۇیۇ خئیمه‌یه یئتیره‌نمه‌دیم

غم-وْ-غۆصصه ده‌ن قۇتۇلانمادێم

هله دردیم آرتدێ گله‌نده سن

باشۇوا اَقلّی دوْلانمادێم

سَند-ی-جهادیمی مُهر ائله

وئریم عمره خاتمه یا حسین

قوْشار: كلامی زنجانی