كیم گؤروب، او دئسین-علی آقا واحد
دوشنبه 23 دی 1392
11:26
0باخیش
ِ مجلیسِ جانانی، كیم گؤروب، او دئسین!
بلایِ محنتِ هیجرانی، كیم گؤروب، او دئسین!
اینانمرام، منه هر كیم دئییر كی جنّت‌وار
گؤزیله روضه‌ی رضوانی كیم گؤروب، او دئسین!
منیم گولوم، چیچه‌گیم، جنّتیم، گؤزه‌ل‌لردیر
بهشتی، حوری و قیلمانی، كیم گؤروب، او دئسین!
كمندِ عشقده، مجنونی گؤرمه‌یه‌ن، نه بیلیر؟
اسیرِ زولف پریشانی، كیم گؤروب، او دئسین!
من آغلادیقجا نیگاریم، گولردی گؤز یاشیما
گولركن، اول گولِ خندانی، كیم گؤروب، او دئسین!
چمنده هر سحر عشق اهلینین ترانه‌سی وار
فغان بولبول نالانی كیم گؤروب، او دئسین!
منیمده، واحد، اؤز ایستكلیمین، گؤزه‌ل لیگیدیر!
باهار زمانی، گولوستانی، كیم گؤروب، او دئسین!
شاعر: علی آقا واحد
یاپیشقانلار: اشعار علی آقا واحد، علی آقا واحد، علی واحد، اشعار تركی علی آقا واحد
