ایمانیله گئتدی-شهریار
پنجشنبه 19 دی 1392
12:47
2باخیش
ییغدی خیر و بركت سفره سین ، احسانیله گئتدی
امن - امانلیق دا یوكون باغلادی ، ایمانیله گئتدی
بیك - خان اولمازسا دئیه ردیك اولاجاق كندیمیز آباد
او خاراب كند ده ولاكن ، ائله بیك خانیله گئتدی
( سیلو ) دایر اولالی ، هرنه دگیرمان ییغیشدی
آمما خالص - تمیز اونلاردا ، دگیرمانیله گئتدی
مستبد سلطانی سالدوق ، كی اولا خلقیمیز آزاد
سونرا باخدیق كی آزادلیق دا او سلطانیله گئتدی
بیر ( بلی قربان ) اولوب ایندی بیزه مین بلی قربان
آمما ( خلعت وئرن ) اول بیر بلی قربانیله گئتدی
دوز مسلمانه دئییردیك ، قولاغی توكلودی بدبخت
ایندی باخ ، گؤر كی او دوزلوك ده ، مسلمانیله گئتدی
وئرمه ( صابر) دئدی ، او دولما - فسنجانی آخوندا
آغزیمیزدان داد ، اول دولما - فسنجانیله گئتدی
دئدی انسانیمیز آزدیر ، هامی انسان گرك اولسون
آمما انسانلیقیمیزدا ، او آز انسانیله گئتدی
بو قدر ( دفتر ) و ( استاد) له ، بیر حقه چاتان یوخ
حق وئرنلر ( پیتیگی ) میزا قلمدان یله گئتدی
بیزه بیر دین قالا بیلمیشدی میراث ، بیرده بو ایران
دین گئده نده دئدی : تك گئتمه رم، ایرانیله گئتدی
ایسته دیك قانلا یوواق اؤلكه میزین لكه سین ، آمما
اؤلكه میز خالص اؤزی لكه اولوب قانیله گئتدی
یورقانی اوغری قاپاندا ، دئدی ملانصرالدین
نیله سین چیلپاغیدی ، اوغرو دا یورقانیله گئتدی
هاوا انسانمی بوغور باش - باشا گاز كربنیك اولموش
یئل ده اسمیر ، ائله بیر ، یئل ده سلیمانیله گئتدی
سو ، كرج دن كلور ایله گلی بو پاسلی دمیردن
گؤره سن شاه سوی تك چشمه نه عنوانیله گئتدی؟
تركی اولموش قدغن ، دیوانیمیزدان دا خبر یوخ
شهریارین دیلی ده وای دئیه ، دیوانیله گئتدی
