ساوالان شعری-هوشنگ جعفری
چهارشنبه 18 دی 1392
08:35
0باخیش
اوچا رایلهامیم او قوشلار كیمی كی
یاز وعده سینده
قووزانیر ماوی گؤیه تا اوجا باش بیر داغا قونسون
كؤرپه قارتال كیمی دیر .
گاه چكیلیر گؤزدن ایتینجك
اگله‌‌نیر گاه ساوالان عشقینه-آغدان-آغا قونسون
هر اوجا داغ كی گؤرورسن باشی قارلا آغاراندی
اورا بیل كی ساوالاندی
آما یوخ!
هر اوجا داغ سسیمی آلسادا تئز قئیته‌ره‌جكدی
سسی قئیترمك همان یئل بیله‌جكدی
آخی یئل یولچودو گئتگین او كی سؤز ساخلایا بیلمز
یئل سؤزو قاپدی قاچیردار اونو كیم هاخلایا بیلمز
یئل گئدرگیندی پیچیللار سؤزو كوللار قولاغیندا
سؤزو قوربان ائله‌یر قیرنادا قانقال آیاغیندا
چئویرر سؤز چاناغیندا
جایالار داغلارا هر بیر سؤزو مین سؤز تؤره‌دندی
بیلمیرم سیری نه دندی
یئل گئدرگیندی یئلی ساخلاماق اولماز
یئله بئل باغلاماق اولماز
آما سن ای سؤزو سینه‌نده كؤزردن ساوالانیم
كیم گله صدقله زرتشت بئجردن ساوالانیم
ائلیمین شانلی داغی باشیوه مینلرجه دولانیم
اریدیب ائل غمی بیر یول سنی كؤكدن ده تالانسان
سئل اولوب قانلی دنیزلركیمی دونیایه جالانسان
آدی دیللرده قالانسان
ساوالانسان ،ساوالانسان
ساوالان ائل غمینی بللی دی ساخلار سینه‌سینده
سینه‌سی كؤزدو آلودور گیزیریك اینسی سی واردیر نفسینده
شاعیرین غملی سسینده آل گیلان ساخلا سن ای ائل داغی غملی قفسینده
ساوالان آلسادا هر سیری سؤزو داغلارا سالماز
گؤره نامرد دوروبدور ساوالاندان سس اوجالماز
ساوالاندا تؤكولن داشلاری دیندیر دانیشارلار
سالسا عاشیق نفسین كوللارا ، كوللار آلیشارلار
دده قورقود سازی چالسا
دلی دومرول باش اوجالدار
بلی البته كی یولداش باشینی ،یولداش اوجالدار
سسله عاشیق سازی چالسین
سسیمیز بیرده اوجالسین
اویناماق لیزگییه دؤنسون
كاس شوشم گوزگویه دؤنسون
قوی وئرك سس سسه باهم اوخویاق بیر ده كوراوغلو دلی سیندن
هجرین قوچ نبیسیندن
او كی ظالیملری مظلوملارین اوستونده ازردی
او كی آسلان كیمی داغلاردا یاتیب باغدا گزردی
اوخو عاشیق اوخو
سن بیل او كی تانری تانییبسان
سؤزومه دوز جالییبسان
سوموگوم قوی سازا گلسین
بولبولوم آوازا گلسین
یازمیشام ائیوازا گلسین
گوج آلاق قوی دلی لردن
باج آلاق اجنبی لردن
او كی بیلمیر نبی كیمدیر قویون آذر ائلینی مسخره سانسین
بیر عؤموردور كی فضولی نی – نسیمی نی دانیب ایندی ده دانسین
شهریار تك سن اوجالت باشیوی قوی عرشه دایانسین
قوی باخار كور تر ایچینده جوموبان اؤلسون –اوتانسین
او كی آخساقدی یوبانسین
او كی توركون دیلین اسكیتمگه تصویره سالیبدیر
او كی توركون بالاسین ایندی ده آشغالچی سانیبدیر
او توفاله بیلیرم فیكرینی طاغوتدان آلیبدیر
او رژیمدندی قالیبدیر
یوخسا توركون بالاسیندان چیخیب علامه‌ی دؤران
اونا دونیا باش اگیر فلسفه‌ده
بیرجه نه ایران
قوی دئییم شهریاریمدان
نیسگیل او چرچی‌‌یه قالسین كی جواهیر نه‌دی ، قانمیر
فیكری آلداتمادادیر خالقی، ائلین حالینه یانمیر
اریمیر ، اؤلمور،اوتانمیر
آخی ای قاردا ، دوماندا باش اوجالدان ساوالانیم
غمی،دونیانی قوجالدان ساوالانیم
ائل بیلیر داغلار آرا هر اوجا داغلار باشی سن‌سن
وئر سهنده الیوی قارداشیوین سیرداشی سن سن
وئرگیلن بیلیك الین بیرده دماونده اونون یولداشی سن‌سن
اوندان آیریلما آماندی
یولوموز چندی دوماندی
قوی ایگیدلر سیزه فخر ائیله‌ییبن باشین اوجالتسین
قویما قارتال دولانان یئرلره قوزغون الی چاتسین
ساوالان چنلی چاغیندا
منیم ایلهامیم اولاركن
كؤنلوم اؤز سیری سؤزون صدق‌ایله سؤیلر ساوالانه
ساوالان كؤز قالادار شاعیر اولانلار سینه سینده
اوردا زرتشت گئدیب تانریدان ایلهامین آلانه
اگیرم باش ساوالانه،اگیرم باش ساوالانه..
