ناز ائیله میسن
سه شنبه 10 دی 1392
06:11
0باخیش
چوخلار اینجیكدی كی، سن اونلارا ناز ائله میسن
من ده اینجیك كی، منیم نازیمی آز ائله میسن
ائتمیسن نازی بو ویرانه كونولده سلطان
ائوین آباداولا ، درویشه نیاز ایله میسن
هر باخیشدا چالیبان كیپریگی مضراب كیمی
بیر قولاق وئر، بوسینیق قلبی نه ساز ایله میسن؟
باشدان آچ یایلیغی ، افشان ائله سوسن – سنبل
سن بیزیم بایراممیزسان قیشی یاز ایله میسن
سن گون اول، قوی غم میز داغدا قار اولسون، اریسین
منیم آنجاق ایشیمی سوز و گداز ایله میسن
من بو معناده غزل یازمالی حالیم یوخودی
سن جوجوق تك قوجانی فرفره باز، ایله میسن
كاكلی باشدا بوروب باغلامیسان تاج كیمی
او قیزیل ساچدان اونا ، گوللی قوتاز ایله میسن
سینه بیر دشت مغان دیر ، قوزی یان – یانه یاتیب
منیم آغلار گوزومی ، اوردا آراز ایله میسن
بو گوزللیك كی جهاندا سنه وئرمیش تانری
هر قدر ناز ائله سن ایله، كی آز ایله میسن
منی بو سوز یله آتدین، آرالاندین بیلیرم
آرانی بیر پارا نامردیله ساز ایله میسن
دستماز ایله دیگین چشمه، مسیحا قانی دیر
بیلمیرم هانسی كلیساده نماز ایله میسن؟
من عشیران اوخوسام، پنجه عراق اوسته گزه ر
گوزه لیم تورك اولالی ترك حجاز ایله میسن
تازا شاعر، بو ده نیز هرنه باخیرسان دیبی یوخ
چوخ اوزاتسان بو غازی، اورده گی قاز ایله میسن
بسكه زلف و خط و خالین قوپالاغین گوتدون
زلفعلی نین باشینی آزقالا داز ایله میسن
گل ! منیم ایسته دیگیم كعبه ییخیلماز، اوجالار
باشدادا كژ گئده سن ، دیبده تراز ایله میسن
خط و خالیندن آلیب مشقیمی قرآن یازارام
بو حقیقت له منی، اهل مجاز ایله میسن
منی، دان اولدوزی، سن یاخشی تانیرسان كه سحر
افقی خلوت ائدیب راز و نیاز ایله میسن
شهریارین داغیلیب، داغدا داشا دالدالانیب
ئوزون انصاف ایله، محمودی ایاز ایله میسن
